लण्डनको बाहिरी भागमा आगजनी र लुटपाट निरन्तर

प्रहरीको कडा सुरक्षाका कारण मंगलबार लण्डनको मुख्य भाग सामान्यतः शान्त रहे पनि बाहिरी भागमा आगजनी र लुटपाट निरन्तर देखियो। लण्डनमा मंगलबार सोह्र हजारको संख्यामा प्रहरी परिचालन गरिएको भएपनि म्यानचेस्टर, सालफोर्ड, वेभह्यामटम, नोटिङहाम, लेसिस्टर र बर्मिङघममा पसल लुट्ने र आगजनी गर्ने क्रम चलिरह्यो। कारबाहीमा मारिएका उनन्तीस वर्षीय मार्क डुवानका समर्थकहरुले विगत पांच दिनदेखि बेलायतको राजधानी लण्डनमा हिंसात्मक गतिविधि चलाइरहेका छन्।

लण्डनको टोटेनहाम निवासी डुवानका करिव दुई सय समर्थकले फेसबुक, ट्युटर र ब्लाकबेरी मेसेञ्जरको प्रयोग गर्दै समर्थक जुटाउने र तोडफोड तथा आगजनी गर्ने क्रम निरन्तर अघि बढाएका छन्। अरव संसारमा राजनीतिक परिवर्तन तथा तानाशाहहरुलाई अपदस्थ गराउन सहायक सिद्ध भएको नयां सामाजिक सञ्चारमाध्यम बेलायतका लागि भने अस्थिरता र अराजकताको कारण बन्न पुगेको छ। हुलदंगा लण्डनबाहिर पनि देखिएको छ। इटलीमा बिदा मनाइरहेका प्रधानमन्त्री डेभिड क्यामरुन सोमबार लण्डन फर्किएपछि सुरक्षामा कडाइ गरिएको छ।